بُرج دینون شَمسِ رَخشانی باتان گُوندور بو گُون
گوز یاشین خون دِله زَهرا قاتان گُوندور بو گُون
اِیلیوب عُقبایه رِحلت حضرتِ ختمی مآب
گُل گیدوب گُلشندن اوُلدی گُلستانِ دین خَراب
باغبان دین ئولوب بلبل لر اوُلدی دِل کباب
باشینه قاره قیزی زَهرا سالان گُوندور بو گُون
حاملانِ عَرشِ اَعظم قاره پوش اوُلدی بو گُون
مُحنت و اَندوهیله اَرض و سَما دُولدی بو گُون
کِثرتِ غمدن جَمال فاطمه سُولدی بو گُون
عزّتی ظاهرده چون باشه چاتان گُوندور بو گُون
ساخلیوب پیغمبره یكسر عَزا قُدّوسیان
نِی کیمی شوره گلوب اِیلر نَوا سَبّوحیان
هم باتوب یاسه اِیدر شیون هامی ناسُوتیان
حوریان كَروبیان قان آغلیان گُوندور بو گُون
بو مُصیبتده سراسر اَهلِ عالم آغلادی
جمله سُکّانِ سَماوات عَرشِ اَعظم آغلادی
عَرشده قوردی مَلائک بَزمِ ماتم آغلادی
ناله و شیون فَضانی دُولدوران گُوندور بو گُون
روزِ خیبر زَهر وِیرمیشدی بُو شاهه اَشقیا
اِیلدی بس که اَثر پیغمبره زَهرِ جَفا
عاقبت دوشدی اَیاقدان شافِعِ روزِ جَزا
نازنین قلبی دوتوب اُود اُودلانان گُوندور بو گُون
ظلمه باخ اوُل سروره اَهلِ عَداوت اِئتدیلر
عِلتِ اِیجاد کُونی نه خیانت اِیتدیلر
آلِ طاهانی غَریقِ بَحرِ مُحنت اِیستدیلر
شهرِ یَثرب آه و دادیله دولان گُوندور بو گُون
وَقت او وَقت اوُلدی گلوب پِیک خداوند اَنام
آلِ طاهانی مُخاطب اِیلیوب وِیردی سلام
سُویلدی حقّدَن واریم دور آیتِ حَقّه سلام
بو سسیله فاطمه دِلدن یانان گُوندور بو گُون
مُضطرب اوُلدی بو سسدن نُورِ عِین مُصطفا
اِیتدی فرمایش که ناخوش دور بابام میرِ هُدا
یوخ مَقاله اِختیاری ضَعف اِیدوب خِیرالورا
گُورماقا مُمكن او شاهی اوُلمیان گُوندور بو گُون
قابِض الأرَواح اَزَلکی عَرضینی تِکرار اِیدوب
تا اوُچومچی مَرتبه اِذن آلماقا اِصرار اِئدوب
مَطلبی خاتونِ مَحشر جَدّینه اِظهار اِئدوب
قان اوُلوب اَشکی یوزه گُوزدن آخان گُوندور بو گُون
اِیتدی فرمایش قیزیم بو قابِض الَارَواحی دور
اِذن وِیر گَلسُون او پِیکِ قاضی الحاجاتی دور
قاپلاری باغلی قویان دور هادمُ الَّذّاتی دور
اوُلما مانِع باشه عُمروم چون چاتان گُوندور بو گُون
اِذن آلوب گلدی خِلاصه مَحضرِ پیغمبره
سُویلدی اوُل دَم پَیامِ خالقی اوُل سَروره
بَذل اِیدوب جان خَتم مُرسَل تا خدای داوره
اَهل دینی بو مُحنده آغلادان گُوندور بو گُون
جان وِیرنده اِیلیوب بیله وَصیت اُمّته
اِحترام اِیتسونله قرانی لَه آلِ عِصمته
بی وَفالَر باخمیوب بو اَمرِ کَان رَحمته
عکسِ اَمره بیر بیرندن رأی الّان گُوندور بو گُون
مُصطفا جان وِیردی باتدی آلِ یاسین ماتَمه
عزّت زَهرایه وِیردی بو مُصبیت خاتَمه
اوُلمادی اَشرار اَلیندن بیرده راحت فاطمه
مَنجَنیقِ غم اوُنون قَلبین سیخان گُوندور بو گُون
قویمادی آسوده زَهرانی جَهاندا أَهلِ نار
مَجلس شُورا قوروب ظلمین بِناسین قوردولار
رأی آلوب بابِ رَسولِ اَکرمی یاندیردیلار
بو جَفایه اَهل کَین فَرصت تاپان گُوندور بو گُون
عِصمت کُبرایه تَنگ اِیتدی جَهانی مُشرکین
حَشره دِین قان آغلاسا آز آغلیوب اَهل یَقین
قوخمیوب دور قَهرِ حقّدن بر مَلا ثانی لَعین
جور و ظلمی دین اِیوین وِیران قویان گُوندور بوگُون
اِیش هارا مُنجر اوُلوب آگه سن اِی صاحِب زَمان
اوُندا که قالدی دَر و دِیوار آراسندا آنان
قالدی نه حاله نِجه عَرض اِیلوم اِی شاهِ جهان
مُوج اِیدوب بَحرِ ستم باشدان آشان گُوندور بو گُون
آز قالور یانسون (شعاع) خامه اَلوندَه بر مَلا
چوخ آچیق ذِکرِ مُصیبت اِیلمه بوندان صُورا
گِچ بو مَطلبدَن اِمامِ عَصر دَن اِیله حَیا
تیرِ غمله دِلدن اوُل شه اُوخ لانان گُوندور بو گُون
- یکشنبه
- 28
- شهریور
- 1400
- ساعت
- 17:56
- نوشته شده توسط
- یوسف اکبری
ادامه مطلب
